Текст песни
Тау эллени Совет Аскер басхады,
Эки къая бир-бирине аугъанды!
Тау эллеге бу сынамлыкъ нек джетди?
Къалмай бирден насыбыбыз нек кетди?
Джарлы бизге аман оноу бичдиле,
Бу кяфырла къаныбызны ичдиле!
Онгу болгъан къазауатха кетдиле,
Онгсузлагъа бир терс оноу этдиле!
Биз барабыз вагонлада олтуруб,
Этеклени джыламукъдан толтуруб!
Биз барабыз ышармайын, кюлмейин,
Элтиб, къайры къуярларын билмейин?
Къыргъыз, къазакъ тюзлеге тёгюлдюк,
Терслигибиз болмайгъанлай сёгюлдюк!
Кёчгюнчю тебгенле болуб атыбыз,
Джокъду бизни къагъытыбыз, хакъыбыз!
Комендантла ызыбыздан марайла,
Ултха сакълаб, кёзюбюзге къарайла!
Комендантла бизни кютюб туралла,
— Къол салыргъа кеч къалдынг, — деб, уралла!
Ёлгенлени салыр кибик джер болмай,
Къабырланы къазар кибик эр болмай,
Тиширыула къабыр къазыу сынайла,
Ёлгенлерин кёмалмайын, джылайла!
Кёб инджилиб, эркин болдукъ, шош болдукъ,
Тутмакълыкъдан башыбызгъа бош болдукъ!
Энди биз да джуртубузгъа къайтайыкъ,
Уллу Аллахха махтау, сала барайыкъ!..
Къыргъыз, къазакъ, къонакъ кибик кёрдюгюз,
Къыйын кюнде, къонакъбайлыкъ этдигиз!
Къыргъыз, къазакъ, сау къалыгъыз, саламат,
Къабырланы сизге этебиз аманат!
Создать песню в Telegram →